|
تا اَبد داغِ قاسمْ / موُنهَ وِ ويرِمْ
|
بي گُناه رَت زيرِ خاك / غَمْ كِردهَ پيرِمْ
|
|
نِزايهَ هيچ دالكهِ / قاسمْ بيارهَ
|
با مِرامْ جوِوُن مَرديش/مين ايل ديارهَ
|
|
هانَه سي توغَمْ دِ بار / هليا دِ حوُنهَ
|
اِ خُدا هيچ دُختري / يَتيمْ نَموُنهَ
|
|
حامد هِي وا سَر زِنهَ / حبيب وِ سينهَ
|
كارِ دُنيا مُردِنهَ / رَسمِش چنينهَ
|
|
قَدِ بوُوَت حَل بيهَ/ هِي چي كَموُني
|
چهل روُزهَ دِ دَس دِيهَ / روُله جوُوني
|
|
خوُوَروُنِت ها مِيان/ هَر كُومْ دِ لايي
|
نالَشوُ تا آسِموُ / بِرار حَنايي
|
|
بي خَووَر دِ گَردِش/چَرخِ زِموُنهَ
|
كه چني ايي دالكَت / بي توُ بَموُنهَ
|
|
لُرسوُ تا خوُزِسوُ / سيت غَمْ دِ بارَن
|
سي تقاصِ خينِ توُ / سَر وِر مِيارَن
|
|
گِلِي وِت چارهَ نويس/چي سيمْ نوُشتي
|
تَش وَني دوُ كَپرِمْ / روُلَمهِ كُشتي
|
|
چَش قَشنگ بالا بلَنگ / بازوُ شِلالِي
|
اَسرِ چَشمْ رَه گِرت /چي اووُ گِلالِي
|
|
اِ شاعر بيا بَنويس / چنوُ كه دوُني
|
قاسمْ رَتهَ زيرِ خاك / اوُ دِ جوُوني
|
|
داغِ توُن عليرضا / وا جوُ خَريهَ
|
تَرك دُنيا اوُ كِردهَ / دِلْ دِش بوُريهَ
|
|
مهِ دِلي لوُ ريز دِ خي/ دي چارهَ دارِمْ
|
سَر كوُچيلمْ اِشكنا / كُشتهَ بِرارِمْ
|
|
قوُموُنهِ گُمْ كِردِمهِ / دُرء گروُني
|
مَردِمْ دار مِيموُ نواز/ چي پَهلووُني
|
|
بَنالمْ سي جوُونيت / قاسمْ بِرارِمْ
|
هَر دو چَشمْ دِ كاسهَ / مهِ سيت دِرارِمْ
|
|
اِ دِلِ تَنيا بَنال / رَت هُمنِشيِنت
|
دِ نِميا سي هَميشهَ / وي سَرزِمينِت
|
|
شوُ اوُما وا سوُزِ دِلْ / سيت بَگريومْ
|
پُكِ دِلْ حالي بَكمْ / تا بَفريومْ
|
|
مِيا چنوُ سيك بَزنمْ / داغْ دِلْ دِرايهَ
|
اَسرِ چَشمْ رهَ بِيرهَ / تا خي بيايهَ
|
|
خوُورَكهِ بِرار مُردهَ/ دوُ دير ديارهَ
|
ري كَنهَ خَرهَ وِ شوُ/غَمْ بي شمارهَ
|
|
مهِ گوُتمْ سي هَميشهَ /هاي دوُ كِنارِمْ
|
رَنگِ پائيز گِرِتهَ / بي توُ بهارِمْ
|
|
بِراري خوُ بَكنيت / دِ ايي زِموُنهَ
|
روُزگار بي اَرزشهَ / وا كَسْ نِموُنهَ
|
بمناسبت چهلمين روز درگذشت شادروان زنده ياد مَرحوُم قاسم موُلايي راد